LONEITUTE THIAN
Loneitu Hriat Tur Puanchhuahna
Loneitu Hriat Tur Puanchhuahna
Botanical name:Gossypium spp
English : Cotton
Hindi :Kapar
La (Gossypium spp) hi eng chin atanga kan piputen an chin nge tih hriat chian theih a ni lova, amaherawhchu, kum tam tak an lo ching tawh a ni tih erawh chu a hriat theih. Silhfen leh mutbu atan te an mamawh avangin thlai dang zingah an lo ching a, an mamawh anga an siam theih nan a herna herawt te, lasaina te, hmûi te, dinlet te, suvel te, lazarna turin lazarban leh rawlawn te an lo nei vek thin. Anmahni thawmhnaw leh mutbute chu anmahni ngeiin an buatsaih a. Rawng lo chhuah hma chuan la chi khat (variety) la-uk an tih chu a rawng a dan avangin a tial nan an hmang a, rawng lo chhuah hnuah chuan rawng chi hrang hrangah thlakin thawmhnaw mawi tak tak anmahni thar atangin an lo siam ve mai thin a ni.
Tunlai thleng hian thingtlang lovah la an la ching thin. Hma erawh a sawn vak lo. A variety chungchangah pawh local variety, kan piputen tunhma atanga an lo chin tawh chin chhunzawm zel a ni mai a. Mizoram sik leh sa pawh a ngeih a, kum tawpah buh seng zawh hnuah an seng (en) ve mai thin. Improved variety lakchhuah a awm lo. A chin dan leh thar zat te a tlangpui i lo tarlang ila.
A CHIN DAN :
Thingtlang lova chin a ni mai a, kangvarah la mu herawta hera a la an lak tawhna an theh thin. Chu chu thlai dang nena chin pawlh tihna a ni (one of the crops in mixed cropping). A chin hun hi March - May thla vel a ni. Tlar emaw bi emaw a nei chuang lova, buh hmunah thlai dang nen an chin pawlh vek mai a ni. La mu hi chhawhchhi emaw antam chi nen te pawh an nuai pawlh a, tum khatah awlsam tein an theh thin.
SIK LEH SA :
La hi kan thlai chin zingah ruahtui emaw hnawng emaw mamawh tam lo tak mai a ni a, hetih laia Mizoram, ruahtui tamna ber rama kan ching ve mek reng hi thil mak angreng tak a ni. Hei vang hi a ni ang kan hotu leh Department mithiam ten variety dang chawkchhuah pawh an tih loh ni. Khawlum leh vawh thu hrim hrimah chuan Zoram boruak hi a tawk viau a, 43℃ a lumah pawh a chin theih.
La hi ruah vantla ringa chin a ni ber a, a ruahtui mamawh dan hi a tlem leh tam lam hrim hrim aiin tha taka insemrual a mamawh. Ruahtui leh hnawng hrim hrim hi a mamawh tam lo, kum khatah 500 mm ruahtui tlaah pawh a chin theih. Hetih lai hian Mizoram ruahtui tla average chu 2005-2094.0 mm, 2006-2338.15 mm, 2007-3140.4 mm, 2008-2174.9 mm, 2009-2051.7 mm a ni thung.
VARIETY :
La ah hian variety hrang engemaw zat a awma , chung zingah chuan North East a chin larte chu MCU-4, MCU-1, Laxmi, Buri, J-34, MCU te an ni a, heng hi long staple an ni a. Short staple pawh a awm a, chung zingah chuan kan la-uk pawh hi a tel. La ah hian chin chi 4 (species) a awm a, chung chu India ramah chin kim vek a ni a, chubakah hybrid leh Bt Cotton an tih pawh a awm ve tawh.
Sawi tawh angin Mizoram a kan chin chu keimahni chin sa local variety te hi an ni a, tah chuan la-uk (Mizo khaki), lapui leh a pangngai (la fang), chu chu kan chin tam berte hi a ni. Lapui leh la-uk hi a ram a, a deh a nuam lo bawk a, an ching tlem.
LEITHA PEK :
Leitha kan pe ngai lova, thingtlang lova kan chin hi a ni mai a. Kangal leh leia leitha awmte hi a ring a ni mai. Tin, leiletah pawh kan la ching hrih lo. Hetih lai hian leitha a mamawh ve tho a, leitha pek dan tur zat recommend sa chu N 60 kg, P2O2 30 kg leh K2O 30 kg la hmun hectare 1 a zau atan a tawk a, chumi pe turin urea kg 130, SSP kg 187 leh MOP kg 50 a tawk.
THLAI VEN HIM :
La hi rannung eng eng emaw in a khawih thin a, hmelma a ngah a, ven uluk a ngai hle. A lar ber pakhat chu a rah nget, pangang sen tereuhte hi a ni. Damdawi pawhin kan veng ngai kher lovang mahse, Endosulfan (Thiodan) 35 EC 2 ml tui litre 1 a pawlhin ni 20 dana kah a tha.
LA EN
La par hi kutin an lawr thin. A hnah ro hi a pan a, a sawm hma avangin la tibawlhhlawh tu a ni a, fimkhur taka lawr tur a ni. }um khatah a fai vek loh avangin tum 2 tum 3 pawh lawr nawn a ngai thin. A thar dan tlangpui chu hectare khatah qtl 8-12 vel a ni, chu chu seed cotton a ni a, her hma, a mu telin tihna a ni. Short staple erawh chu qtl. 4-6 vel a ni thung.
Mizorama kan la chinna hmun leh thar dan kum 7 kalta chhung a mi chu hetiang hi a ni.
Table 36 :
| Sl No. |
|||||
|---|---|---|---|---|---|
chumi hlauva chin tlem hrim hrim |
|||||
Source : Statistical Abstract 2009-2010, Department of Agriculture (CH), Mizoram
A HRALHNA LAM
La hi kan mamawh hle zel a, kan rizai siamtu ho pawhin Mizo thar chu leitur pawh an hmu zo mang lo a ni. Phai atangin a bale in an lei mai thin. Aizawlah hian rizai siam (Cotton Mills) 20 vel an awm a, chung chuan rizaite, lachilh (mattress) leh lukhamte an siam a, hralhna an la hmu em em reng a ni. An mamawh ang tawk Mizo la an hmu lova, phai atangin an chah thin. Thingtlang hmun hrang hrangah pawh rizai siam an awm a, Aizawl a mite chahsa an ring deuh vek a ni. Tunah hian kg khat Rs 25 velin an lei ber.
La chin hi Mizoram climate atang chuan kan recommend ngai lova, amaherawhchu, kan local variety a chin theih a, demand a awm reng lai leh thingtlang lo neih kan bansan tak tak hma chuan tun aia uar thar leh pawh hi thil tha ve tak tur chu a ni. Leilet emaw phaizawlah a mamawh tawk ang chauh tui pein a chin theihin a tih chi viau tho vang.
Source : Lalthanzuala
MSc.(Ag) ,Agro, PG Dip.Agmark
Thlai chin dan
Department of Agriculture (Crop Husbandry)
Mizoram
Page No : 136 - 138
First Edition-2011